సింపిల్ టిప్స్‌తో హెయిర్ లాస్‌కు చెక్

జుట్టు రాలిపోవడం అనేది ఈ రోజుల్లో సర్వసాధారణమైపోయింది. పెరుగుతున్న కాలుష్యం, మారిపోయిన ఆహారపు అలవాట్లు, ఇతరత్రా కారణాల వల్ల పురుషుల్లో ఇదొక ప్రధాన సమస్యగా మారిపోయింది. ఇక స్త్రీలలోనూ ఈ సమస్య అధికమే. జుట్టు రాలుతోందని ఏవేవో నూనెలు, షాంపూలు వాడి సమస్యను మరింత పెద్దది చేసుకుంటున్నారు. అయితే రాలిపోతున్న జుట్టును చూసి బాధపడటం మానేసి.. దాని నివారణకు పరిష్కారం ఆలోచించాలి. కెమికల్స్‌తో కూడిన ప్యాకేజ్‌డ్ నూనెలు, షాంపూలకు స్వస్తి చెప్పి ప్రకృతి సిద్ధమైన సహజ చిట్కాలు పాటిస్తే హెయిర్ లాస్‌ను అదుపులో పెట్టొచ్చు. అవేంటో ఇప్పుడు చూద్దాం.. 

1. వేడి నూనెతో మసాజ్ 

స్వచ్ఛమైన కొబ్బరి నూనె లేదా బాదం నూనెను తీసుకొని కాస్త వేడి చేయాలి. ఇప్పుడు ఆ నూనెను తలకు పట్టించి, మునివేళ్లతో నెమ్మదిగా మసాజ్ చేయాలి. దీని వల్ల రక్త ప్రసరణ బాగా జరిగి జుట్టు కుదుళ్లు గట్టిపడతాయి. ఫలితంగా జుట్టు రాలడం తగ్గుతుంది. 

2. బీట్‌రూట్ జ్యూస్ 

శారీరకంగా మనం ఎదుర్కొనే ప్రతి సమస్యకి వంటింట్లో పరిష్కారం దొరుకుతుంది అనడానికి ఇదొక ఉదాహరణ. మన ఒంట్లో పోషకాహార లోపాన్ని బీట్‌రూట్ పూర్తిచేస్తుంది. కాబట్టి మీరూ రోజూ తీసుకునే ఆహారంలో బీట్‌రూట్ జ్యూస్‌ను కూడా చేర్చితే జుట్టు రాలడాన్ని నివారించొచ్చు.


3. ఉల్లిపాయ జ్యూస్ 

ఉల్లిపాయ జ్యూస్ చాలా మందికి రుచించదు. కానీ దీనిలో అత్యధికంగా ఉంటే సల్ఫర్.. మీ కుదుళ్ల మధ్య రక్తప్రసరణను వేగవంతం చేయడానికి ఉపయోగపడుతుంది. కుదుళ్ల రంధ్రాలను బిగుతుగా చేస్తుంది. ఉల్లిపాయలో ఉండే యాంటీ బ్యాక్టీరియల్ లక్షణాలు సూక్ష్మజీవులను అరికట్టి మీ స్కాల్ప్ ఇన్ఫెక్షన్ సోకకుండా కాపాడతాయి. 

4. గ్రీన్ టీ 

గ్రీన్ టీ అన్ని ఆరోగ్య సమస్యలకు మంచిదే. గ్రీన్ టీ వల్ల జుట్టు రాలడం తగ్గడంతో పాటు కొత్త వెంట్రుకల ఉత్పత్తి కూడా జరుగుతుంది. ఇది మీ జీవక్రియను పెంచి జుట్టు ఎదుగుదల రేటును కూడా పెంచుతుంది. ఒకసారి గ్రీన్ టీ సొల్యూషన్‌ని మీ జుట్టుకు పట్టించండి తేడా మీకే తెలుస్తుంది! 

5. మెడిటేషన్ 

ఒత్తిడి! మనిషిలోని అనేక సమస్యలకు ఇదే కారణం. దీన్ని తగ్గించుకో గలిగితే చాలా రుగ్మతలు దూరమవుతాయి. జుట్టు రాలిపోవడం కూడా..! మీరు రోజూ ధ్యానం (మెడిటేషన్) చేయడం వల్ల మీలోని ఒత్తిడిని తగ్గించుకుంటే జుట్టు రాలడాన్ని కూడా నివారించొచ్చు. 

6. ఉసిరి 

జుట్టు సంబంధిత సమస్యలకు ఉసిరిని మించిన ఔషధం ఇంకోటి లేదు. జుట్టు రాలిపోవడానికి ప్రధాన కారణమైన విటమిన్-సి లోపానికి ఉసిరితో చెక్ పెట్టొచ్చు. అంతేకాకుండా దీనిలో ఉన్న యాంటీఆక్సిడెంట్లు, యాంటీబ్యాక్టీరియల్ లక్షణాలు చుండ్రు, నెత్తి మంటను నివారిస్తాయి. ఉసిరిని తలకు పట్టించడం వల్ల కుదుళ్లకు పోషకాలు బాగా అందుతాయి. దీంతో జుట్టు దృఢంగా మెరుస్తూ ఉంటుంది. 

7. నేచురల్ హెయిర్ మాస్క్ 

జుట్టుకు రకరకాల హెయిర్ మాస్క్‌లు వేసుకోవడం మంచిది. అయితే అవి రసాయనాలతో కూడినవి కాకుండా చూసుకోవాలి. సహజసిద్ధమైన అరటి, కొబ్బరినూనె, ఆలివ్ ఆయిల్, తేనే వంటి వాటితో హెయిర్ మాస్క్‌లు వేసుకుంటే జుట్టు రాలడం తగ్గుతుంది. 
వీటిలో తేనె, ఆలివ్ ఆయిల్‌తో హెయిర్ ప్యాక్ వేసుకుంటే జుట్టు చాలా ఆరోగ్యంగా, దృఢంగా తయారవుతుంది. రెండు టేబుల్‌స్పూన్ల తేనె, అంతే భాగం ఆలివ్ ఆయిల్ తీసుకొని బౌల్‌లో మిక్స్ చేయాలి. దీనికి చిటికెడు దాల్చిన చెక్క గుండను కలిపి పేస్టులా కలపాలి. తరవాత జుట్టుకి వేసుకోవాలి. 

8. వేపాకులు 

వేప సర్వరోగ నివారిణి. దీనిలో ఉన్న ఔషధ గుణాలు జుట్టు రాలడాన్ని అరికడతాయి. వేపలో ఉన్న యాంటీబ్యాక్టీరియల్, యాంటీఫంగల్ లక్షణాలు చుండ్రును నివారించడానికి అద్భుతంగా దోహదపడతాయి. అంతేకాకుండా కుదుళ్లు దృఢంగా తయారవడానికి వేప అద్భుతంగా పనిచేస్తుంది. వేపను హెయిర్ ప్యాక్ కూడా వేసుకోవచ్చు. వేపాకులను ముద్దుగా చేసుకుని ఉడికించాలి. చల్లార్చిన తరవాత తలకు పట్టించాలి. 30 నిమిషాలు అలానే ఉంచి తరవాత తలస్నానం చేయాలి. వారానికి రెండు సార్లు ఇలా చేస్తే ఫలితం కనిపిస్తుంది. 

9. కలబంద 

కలబంద (అలోవీరా)లో ఉండే ఎంజైములు జుట్టు ఎదుగుదలకు బాగా సహకరిస్తాయి. తలకు కలబంద జ్యూస్ లేదా జెల్‌ను పట్టించడంతో పాటు పరగడుపునే ఒక టీస్పూన్ కలబంద జ్యూస్ తీసుకుంటే మీ జుట్టు ఆరోగ్యంగా ఎదుగుతుంది. నెత్తిపై ఉన్న మృత కణాలను కలబంద తొలగిస్తుంది. అంతేకాకుండా కుదుళ్లను దృఢంగా చేస్తుంది. 

10. గుడ్డు, పెరుగు పేస్ట్

ఇది చాలా మందికి తెలిసిన చిట్కానే. గుడ్డులోని తెల్లసొన, పెరుగు కలిపి తలకు పట్టించడం వల్ల జుట్టు రాలడాన్ని నివారించొచ్చు. గుడ్డులో సల్ఫర్ అధికంగా ఉంటుంది. జుట్టు ఆరోగ్యంగా, దృఢంగా కావడానికి సల్ఫర్ ఎంతగానో ఉపయోగపడుతుంది. అంతేకాకుండా గుడ్డులో ఉన్న సెల్ఫర్.. కెరాటిన్, కోలేజెన్‌ను ఉత్పత్తి చేస్తుంది. ఇది చుండ్రును నివారిస్తుంది.